聖誕．應該和誰過

聖誕．應該和誰過

聖誕節，相信都係所有朋友仔期待嘅日子，一嚟有得開PARTY玩、二嚟有得收吓禮物(不過通常係你買禮物嚟交換先，都開心嘅……)

「聖誕出去玩啦喂～」以前臨近聖誕，都會有朋友問我。
當自己以為依句說話係每年一定會出現嘅時候……

「少年，你太年輕了」
身邊啲閨密一個一個咁拍拖，由一班人到四個、三個、兩個……(未拍拖之前，明明大家應承每年都一齊過……)

結果最唔想發生嘅畫面喺上年出現了……（呀！不要再說了！）

自己喺度諗，聖誕一定要同男朋友過?（你哋唔好話我葡萄呀，我肯定你哋有咁諗過！）

真心問：聖誕節應該係一班人玩定兩個人過？

小學都有教啦：聖誕節係普天同慶日子，應該成班人一齊慶祝！

熱戀中朋友：我要同BB 一齊共渡每一個節日，製造回憶！

不過我都相信依個問題都無一個標準答案！

拍咗拖，生活就會有好大改變？有冇諗過生活除咗你眼前嗰個BB之外，都仲有好多人架？記唔記得陪住你喊嗰個閨密／兄弟？陪住你俾呀媽打嗰啲兄弟姊妹？當然，仲有養到你牛高馬大嘅老豆老母啦！

SORRY，好似講遠咗，返番嚟地球先……

其實大時大節除咗你想同你BB製造回憶之外，有好多人都想同你慶祝，一齊開心；不妨試吓將二人活動變成團體活動(嚴禁喺側邊放閃) ，又或者試吓問多啦A夢借法寶，變多個自己出嚟，分身出席活動！

講咗咁耐，都係想同大家講，唔好忘記身邊重要嘅人，所以……

大家今年聖誕唔使約我喇，我決定返屋企同雙親食聖誕大餐。再見！